Burtaniya, Australia da Canada a ranar Lahadin da ta gabata sun amince da kasar Falasdinu a wani sauye-sauye na shekaru da dama na manufofin kasashen yammacin Turai, wanda ya haifar da fushin Isra’ila cikin gaggawa.
Kasar Portugal ita ma za ta amince da kafa kasar Falasdinu a yau ranar Litinin, yayin da Isra’ila ta fuskanci matsin lamba daga kasashen duniya kan yakin Gaza da aka fara kusan shekaru biyu da suka gabata bayan harin da Hamas ta kai a ranar 7 ga Oktoba, 2023.
“A yau, don farfado da fatan zaman lafiya ga Falasdinawa da Isra’ilawa, da samar da kasashe biyu, Burtaniya ta amince da kasar Falasdinu a hukumance,” in ji Firayim Ministan Burtaniya Keir Starmer a cikin wani sako a kan X.
Biritaniya da Kanada sun kasance kasashe na farko na G7 da suka dauki matakin, inda ake sa ran Faransa da sauran kasashe za su bibiyi taron Majalisar Dinkin Duniya na shekara-shekara (UNGA), wanda zai bude ranar Litinin a birnin New York.
Firayim Ministan Kanada Mark Carney ya rubuta a kan X. “Kanada ta amince da kasar Falasdinu kuma za ta ba da haɗin gudunmawa wajen gina alƙawarin samar da zaman lafiya a nan gaba ga ƙasar Falasdinu da Isra’ila.”
Wannan dai wani lokaci ne da Falasdinawan suka dade da kuma burinsu na neman kafa kasa tsawon shekaru da dama, inda kasashen yammacin turai da suka dade suna ganin cewa bai kamata ba kawai ya zo a matsayin wani bangare na yarjejeniyar zaman lafiya da Isra’ila.
Ofishin Jakadancin Falasdinu a Burtaniya ya gudanar da wani biki na musamman a London.
Sai dai matakin ya sanya kasashen su yi hannun riga da Amurka da Isra’ila, inda firaministan Isra’ila Benjamin Netanyahu ya mayar da martani cikin fushi tare da shan alwashin nuna adawa da hakan a tattaunawar ta MDD.
Kiraye-kirayen kafa kasar Falasdinu “zai jefa rayuwarmu cikin hadari kuma ya zama lada na ta’addanci,” in ji Netanyahu.
Kawancen kasashen da suka dade suna kawaye sun canza sheka, yayin da Isra’ila ta zafafa kai hare-hare a zirin Gaza, inda ta sha alwashin kawar da mayakan Falasdinawa na Hamas.
Zirin Gaza dai ya fuskanci barna mai yawa, da yawan mace-mace da kuma karancin abinci wanda ya haifar da matsalar jin kai tun bayan barkewar rikicin da ya janyo cece-kuce tsakanin kasashen duniya.
Gwamnatin Burtaniya ta fuskanci matsin lamba daga jama’a don ta dauki mataki, inda dubban mutane ke yin zanga-zanga a kowane wata a kan tituna. Kuri’ar jin ra’ayin jama’a da YouGov ta fitar ranar Juma’a ta nuna kashi biyu bisa uku na matasan ‘yan Burtaniya masu shekaru 18-25 na goyon bayan kafa kasar Falasdinu.
Mataimakin Firayim Minista David Lammy ya amince a Majalisar Dinkin Duniya a watan Yuli cewa “Birtaniya na da nauyi na musamman don tallafawa tsarin kasa biyu”.
Fiye da ƙarni guda da suka gabata, Burtaniya ta kasance mai taka rawa wajen aza harsashin kafa ƙasar Isra’ila ta hanyar sanarwar Balfour na 1917.
Kashi uku cikin hudu na mambobin Majalisar Dinkin Duniya sun riga sun amince da kasar Falasdinu, inda sama da 140 daga cikin 193 suka dauki matakin.
Starmer ya fada a cikin watan Yuli cewa gwamnatinsa ta Labour na da niyyar amincewa da kasar Falasdinu sai dai idan Isra’ila ta dauki kwararan matakai da suka hada da cimma yarjejeniyar tsagaita bude wuta a Gaza, da samun karin taimako a cikin yankin da kuma tabbatar da cewa ba za ta mamaye yammacin kogin Jordan ba.
Har ila yau, Starmer ya sha yin kira ga Hamas da ta saki sauran mutanen da suka yi garkuwa da su a harin na 2023, kuma ana sa ran za ta kakaba wa mayakan na Falasdinawa sabbin takunkumi.
