‘Yan tawayen M23 da ke samun goyon bayan Rwanda a ranar Litinin sun fice daga tattaunawar zaman lafiya da gwamnatin Jamhuriyar Dimokaradiyyar Congo kasa da sa’o’i 24 kafin bangarorin su gana da juna.
Kawancen ‘yan tawayen, wanda M23 mamba ne, ta ce sun janye daga tattaunawar da bangarorin biyu za su yi kai tsaye, saboda takunkuman da Tarayyar Turai ta kakaba mata da farko kan jami’an M23 na Rwanda.
A cikin wata sanarwa da kungiyar Yankin Kogin Congo ta fitar ta ce matakin na Kungiyar Tarayyar Turai na da nufin dakile tattaunawar da ake sa ran za a yi.
Kungiyar M23 dai ta dade tana neman tattaunawa kai tsaye da gwamnatin Kinshasa, amma shugaban kasar Congo Felix Tshisekedi ya ki amincewa, yana mai cewa M23 reshe ce ga Rwanda.
Ya sauya matsayinsa a ranar Lahadin da ta gabata, ya kuma amince da tura tawaga zuwa Luanda domin mayar da martani ga jerin koma-bayan da aka samu a baya.
Rikicin wanda ya samo asali ne daga kisan kiyashin da aka yi a kasar Rwanda a shekarar 1994 da kuma gasar mamaye arzikin ma’adinai da ke yankin, ya kara a’azzara tun daga watan Janairu.
Mayakan M23 sun kwace manyan garuruwan gabashin Congo guda biyu, inda aka kashe dubban mutane tare da tilastawa daruruwan dubbai barin gidajensu.
Majalisar Dinkin Duniya da manyan kasashen duniya na zargin Rwanda da bayar da makamai tare da tura sojoji yaki da ‘yan kabilar Tutsi na M23. Sai dai Rwanda ta ce dakarunta na daukar matakin kare kai ne daga sojojin Kongo da mayakan sa-kai masu adawa da kasar Rwanda.
