Sojojin Sudan sun ce sun kwace iko da fadar shugaban kasa

Sojojin Sudan sun ce sun kwace iko da fadar shugaban kasar da ke Khartoum babban birnin kasar a ranar Juma’a.

Wannan yana daya daga cikin manyan nasarorin da rundunar ta samu a cikin shekaru biyu na rikici tare da mayakan RSF, wacce ke barazanar raba kasar.

Wani faifan bidiyo da ke yawo a shafukan sada zumunta ya nuna jami’an soji a cikin fadar, suna kabbara a yayin da suke rike da makamai.

A baya dai mayakan RSF ne ke da iko da fadar, ma’ana – tun lokacin da yakin ya barke a watan Afrilun 2023.

Sojojin kasar ta Sudan sun dade suna jan-kafa, amma a baya-bayan nan suna ci gaba da cin galaba, a yayin da suke samun nasarar kwato yankunan da ke tsakiyar kasar. Rundunar ta ce ta kuma kwace iko da ma’aikatu da wasu muhimman gine-gine a tsakiyar birnin na Khartoum.

Majiyoyin sojin Sudan sun ce mayakan na RSF sun janye daga nisan kimanin mita 400, sai dai mayakan na RSF ba su ce komai ba game da ci gaban da sojojin ke samu.