An dakatar da Mourinho na Fenerbahce wasanni uku
An dakatar da Mourinho bayan jan hancin kocin Galatasaray
Hukumar kwallon kafar Turkiyya TFF ta sanar a ranar Asabar da ta gabata cewa, an dakatar da kocin Fenerbahce Jose Mourinho na wasanni uku tare da cin sa tarar kudi kusan fam 6,000 kwatankwacin dalar Amurka 7,734 bayan damke hancin kocin Galatasaray Okan Buruk a wasan da aka yi a Istanbul.
Lamarin ya faru ne a karshen wasan daf da na kusa da na karshe a gasar cin kofin kasar Turkiyya a ranar Laraba, inda kungiyar ta Mourinho ta sha kashi a gida da ci 2-1.
A wata sanarwa da TFF ta fitar ta ce “Za a dakatar da Mourinho shiga dakin sanya tufafi da kuma benci na wasanni uku.”
Mourinho ba zai buga wasan da Trabzonspor, Sivasspor da Kayserispor ba.
Fenerbahce ce ta biyu a gasar Super Lig, inda ta ke biye wa Galatasaray da ke na daya da maki shida da kwantan wasa daya.
