Kungiyar Raya Tattalin Arzikin Yankin Yammacin Afirka (ECOWAS) ta yi sabon shugaba wato Shugaban Kasar Saliyo Maada Bio, bayan karewar wa’adin Shugaban Nijeriya Bola Tinubu wanda ya yi zango biyu a jere a matsayin shugaban kungiyar.
Wa’adin shugabancin Tinubu dai cike yake da matsaloli iri-iri da kalubale musamman bayan juyin mulkin da aka yi a Jamhuriyar Nijar a watan Yunin shekarar 2023, inda sojoji karkashin jagorancin Abdourahamne Tiani suka hambarar da gwamnatin Mohamed Bazoum.
Daya daga cikin manyan kalubalen da Kungiyar ECOWAS ta fuskanta karkashin mulkin Shugaba Tinubu shi ne ficewar mambobin kungiyar uku wato Nijar da Mali da kuma Burkina Faso wadanda duka suke karkashin mulkin soja.Wannan ya sa yayin wani jawabi, Shugaba Tinubu ya taba cewa ECOWAS ba za ta zuba ido tana ganin ana ci gaba da yin juyin mulki bayan juyin mulki ba a kasashen yankin.
ECOWAS karkashin Tinubu ta sanya wa Nijar jerin takunkumai kuma Tinubu ya ce za a yi amfani da karfin tuwo idan ta kama wajen dawo da mulkin dimokradiyya a Nijar, kuma wadannan kalaman da wasu dalilan su ne abubuwan da Nijar da kawayenta suka ce sun harzuka su har suka raba gari da kungiyar.
Ko da yake daga baya ECOWAS ta janye barazanar batun amfani da karfin tuwo kuma ta dage takunkuman da ta kakaba wa Nijar din. Hakan bai rasa nasaba da yadda mutane da dama ciki har da Tsohon Shugaban Nijeriya Janar Yakubu Gowon wanda yana cikin wadanda suka kafa ECOWAS, suka nuna rashin goyon bayansu kan amfani da karfin tuwo a kan Nijar da kuma hadarin da ke tattare da hakan.
Sannan jagorancin ECOWAS karkashin Tinubu ya taimaka wajen wanzar da zaman lafiya a yankin yammacin Afirka ciki har da taimakawa wajen samar da yarjejeniyar Unity Agreement wadda wasu bangarori da ba sa ga maciji da juna a kasar Saliyo suka amince da ita, kamar yadda babbar mai taimaka wa Shugaba Tinubu kan yada labarai Linda Nwabuwa ta bayyana. Takaddama ta fara a Saliyo ne bayan zaben da aka yi a kasar a shekarar 2023 wanda ECOWAS ta taimaka wajen hijirar da tsohon Shugaban Kasar Ernest Koroma ya yi zuwa Nijeriya a wani kokari na kawo karshen takaddamar siyasar da ta kaure a Saliyo.
Kuma ECOWAS karkashin shugabancin Tinubu ta taimaka wajen sauyin shugabancin cikin ruwan sanyi a kasashen Ghana da kuma Liberia a manyan zabukan da suka yi a baya-bayan nan. Idan muka koma gida Nijeriya kuma, yayin da yake shugabancin ECOWAS, Shugaba Tinubu ya kaddamar da fara aikin shinfida bututun iskar gas mai nisan kilomita 200 tsakanin Nijeriya da kasar Equatorial Guinea wanda hakan zai taimaka wajen wadatuwar makamashi a tsakanin kasashen yankin Yammacin Afirka.
A yanzu da Shugaban Saliyo Julius Bio ya maye gurgin Tinubu, kasashen Afirka da ma duniya za su sa ido su ga irin kamun ludayinsa, kuma ko zai iya shawo kan kasashen Mali da Burkina Faso da Nijar su sauya tunaninsu kan kungiyar ko dai su koma ko kuma su kulla wasu sababbin alakoki masu karfi tsakaninsu.
@jaridaradio 23 ga Yuni, 2025
