Isra’ila da Iran: Yarjejeniyar tsagaita wuta tsakanin – Ina aka kwana?

Bayan kwashe fiye da kwana 10 ana barin wuta tsakanin kasashen Isra’ila da Iran, yanzu dai an cim ma yarjeniyar tsagaita wuta tsakaninsu kuma ana fatan kura za ta lafa.

Sanar da yarjejeniyar tsagaita wutar ta fara fitowa ne daga bakin Shugaban Amurka Donald Trump a ranar Litinin da daddare, bayan Iran ta kai wasu hare-hare kan sansanin sojojin Amurka da ke Qatar da Iraki.

Iran ta kai hare-haren ne a matsayin ramuwar gayya, bayan Amurka ta kai wasu jerin hare-hare a cibiyoyin makamin nukiliyarta a karshen makon jiya.

Bayan kai hari cibiyoyin nukiliyar Iran, Trump ya gargadi Iran kan ka da ta kuskura ta mayar da martani kan harin da Amurkan ta kai mata, kuma ya ce dole Iran ta rungumi zaman lafiya.

Sai dai bayan Iran ta kai wa sansanonin Amurka hari, mutane da dama sun zuba ido don ganin mataki na gaba da Amurka za ta dauka, kwatsam sai Shugaba Trump ya sanar da cewa an cim ma yarjejeniyar tsagaita wuta tsakanin Iran da Isra’ila.

Trump ya ce Iran ce za ta fara aiwatar da tsagaita wutar, sannan daga baya kuma Isra’ila za ta dakatar da kai wa Iran hare-hare.

Shugaban Amurkan ya ce tsagaita wutar za ta fara aiki ne bayan awa shida da yin sanarwar. Sannan ya ce bayan sa’a 24 za a kawo karshen yakin kacokan tsakanin kasashen biyu.

Jim kadan sai Firaministan Isra’ila Benjamin Netanyahu ya ce Isra’ila ta amince da shawarar tsagaita wutar da Trump ya bayar, har ma ya ce ya gode wa Amurka bisa “kawar da barazanar nukiliyar Iran.”

Sai dai duk da a farko, Iran ta ce babu wani batun tsagaita wuta, daga baya gidan talabijin na kasar ya sanar da cewa an tsagaita wuta, yana mai cewa an tilasta wa Isra’ila amincewa da tsagaita wutar bayan nasarar harin da Iran ta kai sansanin soji a Qatar.

Sannan gidan talabijin din Iran ya ce Trump ne ya roki a tsagaita wuta bayan harin na Iran. Kuma a karshe sanarwar ta yi jinjina ga dakarun juyin juya-hali na Iran.

Sai dai masana da dama suna cewa babu tabbas ko rikici tsakanin ɓangarorin biyu zai zo ƙarshe, ko tsagaita wutar da Trump ya sanar za ta yi aiki, domin za a iya cewa tun yanzu batun tsagaita wutar ya fara tangal-tangal, kasancewar Isra’ila ta zargi Iran da saba yarjejeniyar har ma ta umarci sojojinta su kai wa Iran hari.

Sai dai ita kuma Iran ta mayar da martani da cewa ko dutse ba ta jefa wa Iran ba bayan tsagaita wutar.

To sai dai shugaba Trump ya ja kunnen Isra’ila da kakkausar murya yana cewa ka da ta sake ta jefa bama-baman nan da take shirin harba wa Iran. A kalamansa, trump ya ce, “Idan kin yi haka babbar saba yarjejeniya ne”. Sannan ya ce, “ku mayar da jiragenku gida yanzu-yanzu.”

Sai dai duk da wannan gargadi, Isra’ila ta kara kai wa Iran hari, amma har zuwa lokacin nadar wannan bidiyo, Iran ba ta kai ga mayar da martani ba.

Kuma da ma ganin abin da ya faru a yarjejeniyar tsagaita wuta tsakanin Hamas da Isra’ila a Gaza a baya, masana da dama sun ce akwai bukatar a jira har zuwa wasu kwanaki, kafin ganin dorewar girmama yarjejeniyar tsagaita wutar tsakanin kasashen biyu.