Shugabanni da wakilai daga kawancen kasashen BRICS za su halarci taron koli karo na 17 na kungiyar a ranakun Lahadi da Litinin a birnin Rio de Janeiro na kasar Brazil.

Taron dai na zuwa ne a daidai lokacin da ake samun tashe-tashen hankula a fagen siyasar duniya, ciki har da hare-haren da Isra’ila da Amurka suka kai kan Iran, wadda ke cikin kungiyar BRICS tun daga shekara ta 2024, tare da kisan kare dangi a zirin Gaza, da kuma yakin Ukraine.

Sake zaben Donald Trump karo na biyu da kuma karin barazanar harajin da ya yi wanda ya haifar da damuwa ga cikikayya a tsakanin kasashen kungiyar.

Shugaban kasar Brazil Luiz Inacio Lula da Silva ne zai karbi bakuncin tattaunawar ta kwanaki biyu, kuma ajandar tattaunawar ta kunshi; hada-hadar kasuwanci da zuba jari, hadin gwiwa kan AI da musayan fasaha, harkokin kiwon lafiya da sauyin yanayi a duniya.

Mece ce kawancen BRICS?

An kafa kungiyar BRICS ne a shekarar 2009 da Brazil da Rasha da Indiya da kuma China suka kafa, bayan shekara daya Afrika ta Kudu ta shiga.

Yanzu haka kungiyar ta kunshi mambobi 11 da suka hada da Saudiyya, Masar, Habasha, Iran, Hadaddiyar Daular Larabawa, da Indonesiya – mamba na baya-bayan nan da ya shiga kungiyar.

Wasu karin kasashe 10 da suka hada da Vietnam da Najeriya da kuma Malesiya sun shiga a matsayin “kasashen abokantaka,” wani sabon tsarin kawance da aka gabatar a taron kasashen BRICS karo na 16 a kasar Rasha.

Kungiyar, wacce ke kallon kanta a matsayin murya ga Kudancin Duniya, tana da kusan kashi 44% na GDP na duniya da sama da kashi 56% na al’ummar duniya.

Su waye za su halarci wannan taron?

Wasu daga cikin shugabannin da suka assasa taron, kamar shugaban Rasha Vladimir Putin da shugaban China Xi Jinping ba za su halarci taron ba.

Putin, wanda ke fuskantar sammacin kamu na kotun hukunta manyan laifuka ta kasa da kasa (ICC), zai shiga taron ne ta naurar bidiyo, a cewar rahotannin kafafen yada labarai. A halin da ake ciki kuma, ministan harkokin wajen kasar Sergey Lavrov ne ya wakilci tawagar Rasha a Brazil.

Xi zai yi fashin taron kolin, wanda shi ne karon farko da bai halarci taron ba a matsayin shugaban kasar China cikin shekaru 12 da suka gabata.

Rahotanni daga kafafen yada labarai na cewa, Beijing ta sanar da gwamnatin kasar Brazil cewa Xi ba zai halarci taron ba. Ana sa ran firaministan kasar China Li Qiang zai halarci taron a madadinsa.

Shi ma shugaban kasar Iran Masoud Pezeshkian ba zai halarci taron ba.

Sauran wadanda zasu halarci taron sun hada da Firayim Ministan Indiya Narendra Modi, Shugaban Afirka ta Kudu Cyril Ramaphosa da Sakatare Janar na Majalisar Dinkin Duniya Antonio Guterres.