Indiya-Pakistan: Manyan jami’an soji za su yi magana a shirin tsagaita wuta

Daga Fadeelah Omar Abdulmalik

A yau litinin ne manyan jami’an soji daga Indiya da Pakistan za su tattauna cikakkun bayanai kan yarjejeniyar tsagaita wuta da aka cimma a tsakaninsu a karshen mako.

Da alama dai yarjejeniyar tsagaita wutar da Amurka ta yi tsakanin kasashe makwabta ma’mallaka makamin Nukiliya ta ci gaba da kasancewa bayan kusan kwanaki hudu ana kai hare-hare ta sama daga bangarorin biyu.

A ranar Asabar din da ta gabata ne shugaba Donald Trump ya sanar da tsagaita bude wuta tsakanin Indiya da Pakistan, yana mai cewa “lokaci ya yi da za a dakatar da hare-haren da ake kai wa a halin yanzu da ka iya haifar da mace-mace da halakar mutane da dama”.

Tuni dai kasashen biyu suka tsagaita bude wuta, amma sun ce suna taka-tsan-tsan, tare da gargadin juna kan illar da ke tattare da karya yarjejeniyar tsagaita bude wuta.

Abin da ya assasa yakin a takaice

• A ranar Alhamis din da ta gabata ce sojojin Indiya suka zargi Pakistan da harba jiragen yaki marasa matuka da makamai masu linzami kan sansanonin soji guda uku da ke Indiya da yankin Kashmir na Indiya, lamarin da Islamabad ta musanta.
• Pakistan ta ce tun farko ta harbo jiragen Indiya marasa matuka guda 25 – Indiya ba ta ce komai ba
• Pakistan ta ce mutane 31 ne suka mutu yayin da 57 suka jikkata sakamakon hare-hare ta sama a Pakistan da Kashmir da ke karkashin Pakistan, da kuma harbe-harbe a kan layin tsaro tun safiyar Laraba.
• A halin da ake ciki kuma, sojojin Indiya sun ce akalla fararen hula 16 ne suka mutu sakamakon harin da Pakistan ta kai musu a gefen iyakarta.
• Indiya ta ce harin makami mai linzami na farko martani ne ga wani kazamin harin da ‘yan bindiga suka kai masu yawon bude ido Indiya a Pahalgam a watan da ya gabata – Islamabad ta musanta hannu.
• Kashmir da ke karkashin ikon Indiya ya gamu da tashe tashen hankula na tsawon shekaru da dama da suka yi sanadiyar mutuwar dubban mutane. Indiya da Pakistan duk sun ce Kashmir gaba daya.