Yakin Isra’ila da Iran – Ina aka kwana?

Iran da Isra’ila na ci gaba da yi wa juna luguden wuta a kwana na biyar tun bayan fara yakin da Isra’ila ta kaddamar a ranar Juma’a, abin da wasu masana suke ganin idan ba a yi wa tufkar hanci ba, za ta iya rikidewa zuwa Yakin Duniya na Uku.

Yayin da yakin yake ci gaba da kazanta, Isra’ila ta ci gaba da kai wa Iran hare-hare a wurare daban-daban ciki har da tashar nukiliyar kasar da gidan talabijin da asibiti da sauran wurare, da kuma uwa uba kashe manyan kwamandojin soja na Iran.

Sai dai kamar yadda wasu masana suka fada, ita ma Iran na gwada wa Isra’ila cewa ita ba kanwar lasa ba ce, saboda tun bayan harin da Isra’ila ta fara kai mata a ranar Juma’a, Iran ta ci gaba da mayar wa Isra’ila zazzafan martani babu kakkautawa.

Ba kamar yakin da Isra’ila take yi da Falasdinawa ba a Gaza da wanda ta yi da Hezbollah a Lebanon, wasu masana suna cewa Iran ta gigita mutanen Isra’ila ta yadda ba su taba tsammani ba. Babban abin da ya fi bai wa duniya mamaki shi ne yadda a kasa da awa 24 da harin farko da Isra’ila ta kai na ba-zata, Iran ta farfado daga shammatar ta da aka yi, sannan ta kaddamar da zafafan hare-hare na ramuwar gayya kan Isra’ila.

Iran ta kai hare-hare a wurare daban-daban a cikin kasar Isra’ila ciki har da ma’aikatar tsaron Isra’ila da wata babbar matatar mai a birnin Haifa da kuma tashar wutar lantarkin kasar. Sannan a birnin Bat Yam, makaman Iran sun kashe kimanin Yahudawa 9 da lalata gine-gine fiye da 60 kuma sun jikkata fiye da mutum 200.
Kazalika a ranar Talata Iran ta kai hari wani ofishin hukumar leken asirin Isra’ila wato Mossad.

Kafin wannan, dama can Iran ta kai wasu hare-hare da suka shafi karamin ofishin jakadancin Amurka da kuma hedkwatar tsaron Isra’ila duka a birnin Tel Aviv.

Zuwa lokacin hada wannan rahoto fiye da Iraniyawa 220 ne suka rasa rayukansu a yakin a cewar hukumomin Iran, yayin da hukomin Isra’ila suke cewa Iran ta kashe musu fiye da mutum 20 tun bayan fara yakin.
Kasashen Amurka da Faransa da Jamus da Indiya su ne suke goyon bayan Isra’ila yayin da kuma Rasha da China da kuma Pakistan suke tare da Iran.

Tuni Firaministan Isra’ila Benjamin Netanyahu yake kiran Amurka ta shiga yakin, kuma yana amfani da duk hanyoyi don shigar da Amurka yakin da ya fara, duk da a farko Amurka din ta nuna ba ta sha’awar shiga.
Sai dai wasu masana suna ganin take-taken Amurka yana nuna cewa idan yakin ya ci gaba a haka wato Iran ta ci gaba da kai wa Isra’ila munanan hare-hare, to akwai yiwuwar Amurkan za ta shigarwa Isra’ila.

A daya bangaren babu tabbaci ko Rasha da China za su taimaka wa Iran ko da kuwa da manyan makamai ne. Ko da yake akwai yiwuwar Iran za ta iya samun tallafi daga Pakistan wacce take da makamin nukiliya kuma take makwabtaka kai-tsaye da Iran.

A wani bangaren kuma wasu kasashe irin su Turkiyya suna ta kokarin bin matakan diflomasiyya wajen kawo karshen yakin, abin da dama masana diflomasiyya suke ganin sulhun shi ne babbar hanyar kawo karshen wannan mummunan yaki.

Yiwuwar kawo karshen wannan yaki ta hanyar sulhu ya kara fitowa fili ne bayan da Shugaban Faransa Emmanuel Macron ya ce Shugaban Amurka Donald Trump ya bar taron G7 wanda ake yi a Kanada da wuri ne domin ƙoƙarin sulhunta rikicin.

Sai dai murna ta koma ciki ga masu son a warware yakin ta hanyar sulhu, bayan da Shugaba Trump ya ce ba don ƙoƙarin sulhunta Isra’ila da Iran ne ya sa ya bar taron G7 ba.