Gwamnatin Kano Ta Yi Allah-wadai Da Korar ‘Yan Arewa Daga FCT

Gwamnatin jihar Kano ta bayyana damuwarta kan yadda ake ta mayar da ‘yan kasar daga babban birnin tarayya Abuja zuwa Kano da sauran jihohin Arewa.

Kwamishiniyar harkokin mata, yara da nakasassu ta jihar, Hajiya Amina Sani-Abdullahi, ta bayyana hakan a wata sanarwa da ta rabawa manema labarai ranar Alhamis a Kano.

Ta ce gwamnatin jihar ta lura cewa a cikin makonni hudu da suka gabata, an mayar da wasu ‘yan Najeriya da dama da suka hada da ‘yan asalin Kano, Jigawa, Katsina, da Kaduna daga babban birnin tarayya Abuja zuwa Kano.

A cewarta, matakin da hukumar babban birnin tarayya Abuja ta dauka ya saba wa ‘yancin da tsarin mulki ya ba kowane dan Najeriya na zama da kuma neman abin rayuwa a kowane yanki na kasar nan, matukar ba za su kawo barazana ga zaman lafiya da tsaron jama’a ba.

“Babban birnin tarayya Abuja ba mallakin wata jiha ko yanki ba ce, gadon kowani ‘dan Nijeriya ne kuma gida ne ga kowa da kowa.

“Idan aka sami wasu mutane suna yin ayyukan da kuke ganin ba a so, tsarin mutuntaka da tsarin mulki shi ne tsara shirye-shiryen karfafawa.

“Ba da tallafi, ko samar da dama don gyarawa da haɗin gwiwar tattalin arziki mai ma’ana ba tilastawa kora ba.

“A Kano, mun karbi bakuncin mutane daga ko’ina cikin Najeriya, ciki har da jihar Ribas da sauran yankuna, kuma suna rayuwa, aiki, da bayar da gudummawa ga tattalin arzikinmu ba tare da nuna bambanci ba.

“Wannan ruhun ’yan’uwantaka na ƙasa ne ke ƙarfafa haɗin kanmu,” in ji ta.

Kwamishiniyar ta kara da cewa, rahotannin da wasu daga cikin wadanda aka kora suka bayar ya yi nuni da cewa an tsare su sama da kwanaki 10 a gidan yari, kuma suna ciyar da su sau daya a kullum.

Ta bayyana wannan mu’amala a matsayin wulakanci da ba za a amince dashi ba a cikin al’umma mai tsarin mulkin  dimokuradiyya.

Kwamishiniyar ta ce gwamnatin jihar a karkashin Gwamna Abba Kabir-Yusuf ba za ta amince da wulakanci da ake yi wa ‘yan kasar ba, tana mai kira ga gwamnatin babban birnin tarayya Abuja da ta kawo karshen korar da aka yi ba bisa ka’ida ba.

“Muna kira ga Hukumar babban birnin tarayya Abuja da ta sake duba tsarinta tare da daukar karin matakan mutuntaka, halal da kuma ingantattun matakan tafiyar da irin wadannan al’amura da ke tafiya,” in ji ta. (NAN)