Adamawa: Yadda aka kashe mafarauta 10 a Hong

Fadeelah Abdulmalik

A ranar 27 ga Afrilu, 2025, an kashe goma daga cikin mafarauta 40 da suka je aikin ceto a kauyen Kwapre a karamar hukumar Hong na jihar Adamawa.

Shugaban kungiyar mafarauta ta Nijeriya reshen Arewa maso Gabas, Shawulu Yohanna, ya tabbatar da faruwar lamarin, inda ya ce mafarautan sun taka rawar gani a fafatawarsu da ‘yan ta’addan Boko Haram.

“Zan iya tabbatar muku da cewa mutane 10 daga cikin mafarautana sun rasa rayukansu a yayin wani artabu da ‘yan ta’addan boko haram, bayan amsa kiraye-kirayen kai harin ‘yan ta’addan kauyen Kopire.

“Mun tattara mafarautan guda 40 wadanda suka fito daga kananan hukumomin Hawul da Biu a jihar Borno, da kuma garin Garkida na jihar Adamawa domin mu fuskanci ‘yan ta’addan, abin takaici, a yayin arangamar da ta dauki tsawon sa’o’i da yawa, alburusan mafarautanmu suka kare, kuma ‘yan ta’addan sun yi nasarar kashe mutum 10, amma mun kwato gawarwakinsu,” inji shi.

Yohanna ya ce yadda ‘yan ta’adda Boko Haram ke sake salon kai hare-hare a cikin al’umma abu ne mai matukar tayar da hankali da tsoratarwa.

Hakan ya zo ne sa’o’i 12 da ‘yan ta’addan suka kashe sama da mutane 30 da suka hada da mata da kananan yara a Kala Balge da karamar hukumar Gambarou Ngala a jihar Borno.