Borno: Mutum 26 sun halaka a tashin bom
Akalla mutane 26 ne suka rasa rayukansu, yayin da wasu uku suka samu raunuka
Daga Adamu Aliyu Ngulde
Akalla mutane 26 ne suka rasa rayukansu, yayin da wasu uku suka samu raunuka, sakamakon fashewar wani bam a kan hanyar Rann–Kala Balge–Gamboru Ngala a jihar Borno da ke yankin Arewa Maso Gabashin Najeriya.
Jarida Radio ta gano cewa motocin fararen hula da dama daga Rann a karamar hukumar Kala Balge ne su ka ci karo da wasu bama-bamai da aka binne a hanya.
Hakazalika lamarin ya faru ne a ranar Litinin, bayan da jerin gwanon motocin suka shiga yankin da aka dasa bama-baman cikin dabara.
Sannan motsin motocin ne ya tayar da bama-baman, kuma jami’an agajin gaggawa sun hanzarta zuwa wajen domin kwashe wadanda abin ya shafa da kuma bayar da kulawar gaggawa.
“Dakarun tsaro sun killace hanyar da lamarin ya faru, kuma sun fara gudanar da bincike domin tabbatar da tsaro da kuma hana faruwar irin hakan a nan gaba,” inji wani ganau.
