Yayin da aka doshi mako guda ana gwabza yaki tsakanin Isra’ila da Iran bayan da kwatsam ba tare da wata takala ba, Isra’ila ta fara kai wa Iran mummunan hari a ranar Juma’a, inda ta kashe mata wasu manyan sojoji da wasu manyan masana kimiyyar nukiliya na kasar.
Isra’ila wacce ta mallaki makamin nukiliya ta ce ta dauki wannan mataki ne saboda Iran din tana gab da mallakar nata makamin nukiliyan, kuma Isra’ila tana yawan cewa idan Iran ta mallaki makamin, to hakan zai haifar da babbar barazana a gare ta. Sai dai manyan kasashen duniya ciki har da Amurka sun tabbatar da cewa Iran din ba ta kai ga mallakar makamin nukiliya ba.
Wai shin ma wadanne kasashe ne suka mallaki makamin nukiliya?
Kafin mu zayyano sunayen kasashen, yana da kyau a fahimci cewa makamin nukiliya ne makami mafi hadari a duniya a wannan zamani, kamar yadda Majalisar Dinkin Duniya ta bayyana. Makamin nukiliya guda daya kawai na iya kashe dubunnan daruruwan mutane a cikin kankanin lokaci kuma wannan ya sa wasu suke kiran shi makamin kare dangi. Har yanzu duniya tana jimamin kisan fiye da mutane dubu dari biyu da arba’in da suka mutu sakamakon jefa makaman nukiliya da Amurka ta yi a Hiroshima da Nagasaki a cikin watan Agustan 1945, lokacin Yakin Duniya Na Biyu. Kuma wadannan su ne kadai lokacin da aka yi taba amfani da makamin na kare dangi a duniya, tun daga nan babu wata kasa da ta kara amfani da shi, saboda tsabar hatsarinsa. Majalisar Dinkin Duniya ta ce akwai kimanin makaman kare dangi 12,000 zuwa 13,400 a duniya.
A yanzu haka kasashen duniya tara ne suka mallaki wannan makami
Kasar Rasha ce ta fi kowace kasa mallakar makaman inda take da guda 5,459.
Kasa ta biyu da ke da yawan makaman nukiliya ita ce Amurka wacce take da guda 5,117.
Sai China wacce take da makaman nukiliya 600.
Faransa na da 290 yayin da Birtaniya take da 225.
Indiya tana da makamin na kare- danga 180, sai makwabciyarta wato Pakistan da take da guda 170.
Isra’ila tana da makaman nukiliya 90. Koriya ta Arewa kuma tana da guda 50.
Bayan wadannan kasashe tara kusan babu wata kasa da ta mallaki makamin.
Sannan kuma a yanzu duniya ta hana kowace kasa sake mallakar makamin na kare dangi, domin a cewar Majalisar Dinkin Duniya, kamata ya yi ma a raba duniya da wadanda ake da su yanzu haka.
Gaba daya kasashen Larabawa babu guda da ta mallaki makamin nukiliya.
Kuma hakan ne ma ya sa wani fitaccen malamin addinin a Nijeriya Dokta Ahmad Gumi ya wallafa wani tsokacinsa a shafinsa na Facebook dangane da hakan, inda ya ce Allah Ya yi umarni da tattalin kera makamai, kuma sai malamin ya bayyana takaicinsa kan cewa sauran kasashen duniya sun bar kasashen Larabawa a baya a wannan fanni.
